Manumba hali bado tete, afanyiwa uchunguzi zaidi

Mkurugenzi wa Makosa ya Jinai nchini (DCI), Robert Manumba, hali yake imeendelea kuwa tete na sasa anafanyiwa uchunguzi zaidi.

Taarifa zilizopatikana jana zilisema kuwa Manumba alitolewa kwenye chumba cha wagonjwa mahututi (ICU) majira  ya saa 5:25 asubuhi na kupelekwa katika chumba maalum kwa ajili ya uchunguzi.

Wakati Manumba akipelekwa katika chumba hicho alikuwa amewekewa mashine mbalimbali katika mwili wake.

Mpaka gazeti hili linaondoka katika eneo la hospitali ndugu wa Manumba walikuwa wakimsubiri atoke katika chumba hicho.

Hata hivyo, waandishi wa habari jana walijikuta katika wakati mgumu pale walipokuwa wakifuatilia hali ya mkurugenzi huyo baada ya kukosa mtu wa kutoa taarifa hizo.

Majira ya saa 10:30 jioni  Waziri wa Mambo ya Ndani ya Nchi, Dk. Emannuel Nchimbi, alifika  kumjulia hali Manumba ambapo aliwaambia waandishi wa habari kuwa hali yake si nzuri.

Kwa upande wake Mkurugenzi wa Tiba wa Hospitali hiyo , Dk. Jaffer  Dharsee, alipoulizwa kuhusu hali ya  Manumba alisema taarifa aliyoitoa juzi haina tofauti na ya jana na kuongeza kuwa amepelekwa kwenye uchunguzi zaidi na kuahidi kutoa taarifa baadae.

 

Baadhi ya viongozi walimtembelea jana ni Naibu Waziri wa Mambo ya Ndani ya Nchi, Pereira Silima na  Mkuu wa mkoa, Meck Sadick .            

Ndugu wa mgonjwa huyo walifurika hospitalini hapo huku wakiwa katika hali ya majonzi. 

Taarifa zilieleza kuwa Makamu wa Rais, Dk. Ghalib Bilal alitarajiwa kwenda kumjulia hali Mkurugenzi huyo.

CHANZO: NIPASHE

Kuhusu: